Medikuntza eta Odontologia fakultateko ikasleek euskaraz ikasi ezin dutela salatzeko, itxialdia egin dute Leioan 112 ikaslek. Egoera aldatzeko Euskal Herriko Unibertsitatearen eta Osakidetzaren "borondate falta" kritikatu dute.

Ikasleen iritziz, fakultateko dekanotzak uste du bere betebeharra "osasun arloko graduak eskaintzea" dela, "euskaraz eman zein ez". Halaber, ez dute "onargarritzat" jotzen "mundu osoan euskaraz ikas daitekeen unibertsitate bakarrean euskararen aldeko jarrera aktiborik ez egotea".

Osakidetzari dagokionez, ikasleek uste dute "ikasketa prozesuaren aurrean jarrera guztiz pasiboa" duela, haien "ikasteko baldintzak hobetzea saihesten" duela eta graduen "izaera praktikoa" murrizten duela: "Euskara ere inertziaren esku uzten dute, eta begi bistakoa da, hizkuntza gutxitua izanik, inertziak egoera txartu baino ez duela egiten".